Hai pouco presentamos a exposición das letras galegas, e contámosvos que alí están expostos os libros de nova adquisición, que escollimos dende o equipo de dinamización da lingua galega para que o próximo curso pasen a formar parte da biblioteca do cole, e pensamos que sería boa idea que tanto o alumnado, coma o profesorado e as familias, vaian coñecendo algunhas novidades dos moitos libros que teñen á súa disposición na biblioteca do cole.
Todos os que presentamos son da editorial Kalandraka.
Hai verdadeiras xoias así que vos animamos a que vos acheguedes a velos: ler sempre é unha aventura!
A galiña roxa
Atopou uns grans de trigo, sementounos, recolleu a colleita, foi ao muíño, forneou o pan... Pero nin o can, nin o gato nin o pato lle axudaron a facer todo ese traballo, os moi cómodos e nugalláns.
Gatiño e a neve
...Brancos coma a neve, negros coma o carbón. A amizade entre Gatiño e Coella é o paradigma da integración entre dúas especies que, coma as persoas, poden ser iguais pero diferentes.
Niños
Grandes, pequenos, accesibles, agochados, orixinais, sinxelos... estes paxaros estrafalarios habitan en fogares dispares. Tan diferentes e á vez tan parecidas, as aves suscitan curiosidade e admiración.
Cando sexades pequenos
Invertindo a orde natural, son os nenos os que lles anuncian aos maiores que lles agardaría se volveran á nenez: volver gozar das pequenas cousas, sen convencións nin prexuízos.
O soño de matías
A arte éo todo para Matías. A súa primeira visita a un museo cámbialle a vida e ábrelle as portas a un mundo de formas e cores para plasmar os seus soños sobre lenzos.
Un gorila, un libro para aprender a contar
Un gorila, dous orangutáns, tres chimpancés... e ti. Un álbum ilustrado para aprender a contar na compaña dos primates, que malia seren os parentes máis próximos dos humanos, algunhas especies viven ameazadas.
No hay comentarios:
Publicar un comentario